للكوسه فى مصر شئووون

للكوسه في بلادي
شئون

بتخلي المسنود فرعون

يتفرعن فين مهما يكون

وتخلي الجاهل أستاذ

والأعرج لاعب جمباز

وتخلي الأحول هداف

والكوره الآوت ف الجون

للكوسه ف بلادي شئون

لو تعرف واحد ف الشرطه

راح تخرج من أجدع ورطه

والراجل اللي انت ظلمته

تلاقيه متلقح مسجون

أو تعرف شخصيه كبيره

شغاله ف البنك مديره

راح تاخد من غير ضمانات

كام قرض بمليون مليون

وهروبك طبعا مضمون

ويا عيني لو تعرف نايب

ف المجلس مش نايب خايب

راح تبني أبراج وهميه

أوراقها مظبوطه أكيد

وفلوس الناس المهريه

حتجيلك م الجيب للإيد

بعديها تروح المستشفى

وتقيد نفسك مجنون

أحكامك تسقط ف ساعتها

بعديها ترجع موزون

ويا عيني لو تعرف شيخ

فجنابك طاهر علطول

وصيامك طبعا مقبول

وإذا فرضا حبيت تتجوز

تتجوز من غير مأذون

وإذا ساكن ف عماره جديده

وحبيبك راجل مسئول

فسيادتك من غير ما تقول

يركب لك فورا تليفون

ولو انت عندك عربيه

ونمرها سوده بنسرين

حتعدي أجدعها كمين

وحتكسر أوضحها إشاره

ماهو نمرك سوده جباره

ولا تعرف أيتها قانون

ولو انت بتعرف فرّان

أو واحد بياع جرنان

راح تاخد طلبك وحتمشي

من غير ولا دوشه ولا دور

والناس الغلبانه حتاخد

طلباتها بعدك وتغور

ماهو كله غيرك بيهون

ولو انت زميل الحلاق

راح تحلق اولها زبون

وإذا كنت بتعرف دكتور

حتعيش متطمن مسرور

وحتسلك ف لجان الشفوي

ومجال تعيينك موفور

وحتطلع فالتليفزيون

بالبدله وفيها الببيون

تتكلم وبكل بساطه

عن شرف المهنه المدفون

لكن لو شاعر غلبان

قلت اللي ف نفسك علطول

حيقولو مين قال لك قول

ويهاجمك مليون إنسان

مسنى الردود شكرا

جااااامد اوى الموضوع ده

ولو انت زميل الحلاق

راح تحلق اولها زبون

غلط طبعا انت اما بتروح عند خطاب بتحلق اول واحدلا طبعا

بتستنا الدور

ليه لانك حقير مجهول

هههههههههههههههههههههههههه
هههههههههههههههههه

انما انا كبير على طول يوم ما قول يا حلاقه يجيلى لحد البيت

تسلم ياوادحلو موضوع الكوسه ده

وعلى راى المثل الى له ظهر ما ينضربش على بطنه

أو تعرف شخصيه كبيره

شغاله ف البنك مديره

راح تاخد من غير ضمانات

كام قرض بمليون مليون

وهروبك طبعا مضمون

تسلم ايديك جميل أوى بجد عرفت تعبر يانينو على الوضع فى الدولة برافو عليك

تسلمم يا شباب على الردود بجد فعلا نورتم الموضوع
ويارب يكون عجبكم

بجد مصر ما هى الا كوسه كوسه وتهوة الحبابيب هههههههههههههههههههههه جامد جدا يا نينو