مغامرات جبيصى المحدودة .فى دنيا النسوان المعدودة

"حدوتة فني اكراما لخاطر بنت الغربة المكتئبة زيها زي بقية أمة لا اله الا الله"
اكتب هذا الموضوع ليس للتشهير بأي حسب الله مستقيم
انما هو قرصة ودن لأي ستيته غافلة .. بتاخد بنطلون حنفي فومين .. وتدعك رجلها بالحجر .. وتصلي العشا وتنام
في شغلتنا اللي هي العلم لا يكيل بالبتنجان فيه شهور فاصلة في حياة اي نشيطة علمية منا
يعني ممكن كده قد "اربع خمس شهور" كل خمس سنين مرة، ما تبقاش شايفة أدامها من وراها
صاحية نايمة ورق فوقها وورق تحتها وورق ع المكتب وورق ع السفرة وورق حتى في المطبخ
هي شهور صعيبة لا يقدرها غير اللي بيتزنق زنقتنا .. بس على قلبنا زي العسل .. وما نيل المطالب بالتمني
بعد الكام شهر دول ترجع الواحدة منا بني ادمة عادية جدا .. لو زوجة بتعوض بيتها وجوزها وولادها أيام العذاب .. ولو آنسة بتنااااااااااااااااام
جاءت لي صاحبتنا الأنتيم وكانت مستنية خلاص ردود المحكمين اللي ها يجيزوا رسالتها أو يرجعوها للساقية تصليح وتعديل وبلاء ازرق
كانت على وجهها علامات الإرتياح والنصر وكأنها فتحت تل ابيب
المحكمين ردوا؟ شكلك مبسوطة؟ عرفتي حاجة عن الرسالة؟
نووووو بس ربنا سترها معايا انا بقى لي شهور في معركة اشرس كتير من معركة الدكتوراة
خير فيه ايه؟
ها أحكي ليكي امال افضفض مع مين اطق يعني؟ اصلي ما ينفعش اقول لمامي "اصلها فافي ياناس"
ان شا الله الأعادي ياختي قولي قولي ده انا ستيته مش مامي
بدأت سرد القصة المشوقة الجديدة القديمة قدم الزمن


الراجل ياأوختي ربنا يخليه لي ولا يحرمني صحبته دنيا وآخره كان ها يروح مني
الشر بره وبعيد .. تروماي كان ها يطسه؟
لأ ولية كانت ها تهفه
اوووووووه نوووووووووووه سيترووووووووه "قلت ابقى فافي انا كمان هو انا قليلة ده انا ستيته
انا مشغولة في تقفيل الرسالة وهو انتي عارفه من البيت للشغل ومن الشغل للبيت
وكونه ربنا يكرمه من نفس "كريرنا" فهو دايما بيقدر ظروف الرسالة المطينة بطين ودايما بيوريني دعم لولاه والله لا كنت رحت ولا جيت
المهم من اربع خمس اشهر لقيت جبيصي بيتغير ياستيته .. ومبقاش فيا حاجة حلوة خالص .. البيت مبهدل اوف .. العيال كل يوم انا اللي ها أأكلهم .. تعالي يابنتي اسرح لك شعرك اوف .. انت يازفت يا اسامة ها تتهد ولا اجي اربيك اوف
عشت مسلسل اوف متصل غير منفصل وده مش طبع جبيصي حبيبي

قلت اتهدي يابت يا نونا وأرمي الورق على جنب وأعملي تشيس كيك والبسي الحتة المشمشي وقعدي جبوصي على كرسي الإعتراف
المهم بما ان حبيبي من نوع هاديء ابتداءا وعاقل انتهاءا انبسطت اساريره وامتصيت غضبه وابتدى يحكي لي على شغله .. ما انتي عارفة كلنا بيوتنا جوا الجامعة والجامعة جوا بيوتنا وهو بس كان مفتقد حكاوي القهاوي بتاعتنا لما بنفرش سجادة في البلكونه ونقعد نحكي لحد الفجر
لمت نفسي جدا ولطشتها قلمين ..
والله يا حبي انا مفتقده الكلام معاك اكتر منك عشرين مرة خلاص هانت انا في النسخة النهائية من التصليحات
ربنا ييسر امرك يا نونا يالا اعملي بقى كوبايتين شاي علشان احكي ليكي حكاوي الكنترول
كنت ها اقول له ما تعملهم انت على ما أغطي العيال .. قلت لمي نفسك واعملي كوبايتين الشاي ده انا يادوب فكيت فيونكة حواجبه
قعد حبي يحكي حكاوي شهريار اللي بموت فيها وفي نص الحكاية سيرة دكتورة فلانة اللي بتطبخ وتجيب الكنترول .. كمان جملتين دكتورة فلانة اللي مهملة خالص ترقيتها المهم ابنها
كل يومين تلاته دكتورة فلانة عملت كذا في الكنترول كركركركركركر
انا ع الهادي خالص: ودي في قسم ايه يا حبي
في قسم ترتان
ومتجوزة
انتبه جبيصي انه وقع وماحدش سمى عليه وارتفعت ودانه وشال عينه من عيني : مش عارف .. ارملة .. مطلقة .. الله اعلم
ياعييييييييييييني .. وعندها "كيدز"؟
باين ولد .. الله اعلم مسألتهاش
يا حراااااااااااااااااااااااااااام
خلصت الليلة اللي زي الفل وتبعتها ليالي نصها جبوصي أمور ومسالم ووديع.. ونصها جبيصي مش طايق نفسه
وماله شيلي الموضوع في البؤجة دلوقتي يانونا لحد ما تفضي دي هانت خالص يابت
يرن موبيل حبي ميسد .. يبص في الموبيل
كمان شوية ميسد .. يبص في الموبيل
وانا لابسه ايه؟
وش العبيط يانونا؟
تمام ياستيته يا معلمانا يامثقفانا

شفت النمرة وحفظتها في فيمتو ثانية
مساكين اللي بيتجوزوا علومانجية .. بيضيعوا نفسهم ويحسبون انهم مكارين واذكياء ورجالة توتي فروتي
رحنا مصيف يرن الموبيل
مين ياحبي؟ ده عباس.. عباس مين يا ابو العيال؟ واحد صاحبي من الجامعة
اشوف نمرة عبس الاقي نفس النمرة اللي انا حفظاها ويقوم واخد الموبيل بعيد عن الشاليه ويتكلم
خلصت الرسالة وسلمتها لعشماوي "المحكمين" وفضيت لجوزي ابو العيال الغالي
في هاذوه الأثناء كنا اتعزمنا عند واحد صاحبه راجع من بلاد الفرنجة ولقيت الراجل بهجت ده بيعامل مراته معاملة عبيد ياستيتة .. قلة ادب وشخط والولية ما بتفتحش بؤها لما نكون بنتناقش خالص .. بينما انا بربنط زي ما انتي عارفة وجوزي اصلا بيحب كلامي وبيحترمه وما يفوتش كلمة اقولها الا لما يناقشني فيها بالموافقة او الرفض "راجل ايجابي وعسل يا أوختي
المهم لميت المواضيع على بعضها ست جديدة وجاهزة وبتعمل محشي ياولاد في الجامعة وكشري كمان وصاحب لا أنا عاجباه ولا هو عاجبني وزوج تركته فترة علشان مصالحي وهو حساس ومصلي وابن ناس مش ها يغلط معاذ الله .. ده لما حاجة "تنخشش" في نفوخه ها يتجوز على طول
حبوبي صحيني الصبح بدري معاك
مش عادتك تصحي ستة .. خير
ها أروح معاك الكلية ياحبي
ازبهلال : ليه .. خير
عادي طول عمري بحب اوضب مكتبك وبعدين بقيت رئيس قسم ورئيس كنترول في جامعة جديدة انا لسه مدخلتهاش .. مش عاوز الناس تتعرف بنونا ولا ايه؟
بما انه عارف اني استحالة اقوم وافوق قبل عشرة نام وهو بيقول حاضر
حضرلك الخير يا حبي
الساعة سته كنت بصحييييييييييه .. قام واكل سد الحنك .. حاول ان يثنيني بس انتي عارفاني خلاص النهارده يا أقطع عرق يا أقطع رقبة
رحت معاه وقابلني جميع الزملاء والزميلات وأساتذتنا كمان بالترحاب والضحك والهزار وكله بيعايني من فوق لتحت وكمان شوية بينافقوني "ياختي يا جماله علشان خاطر عيونه
جه بهجت " انتي على طول لزقاله كده؟"
"وانت مال اهلك" .. جبيصي اكفهر وجهه ومعجبوش اجابتي وزام .. وانا لابسه إيه؟
وش العبيط
وانا واقفة وسط ثلة من الولايا الدكتورات : امال فين دكتورة علانه
الجميع ينظر لبعضه كأن قرصهم حنش .. جوزي اصفر .. بهجت احمر
اصلها خدمتنا في تأشيرة دخول ابني المدرسة ولازم اشكرها بنفسي "خص نص" على رأي السوريين
قالوا دي جت معانا في باص الجامعة يعني ها تكون هنا أو هنا
دورنا عليها في كل مكان .. فص كلوريد صوديوم وداب ياناس
جت صحبتها الأنتيخ "دكتورة ظريفة جدا اسكندرانية" قالت دي تعبت شوية وروحت مواصلات
قعدت مع صاحبتها لوحدي وعملت لي كوباية شاي وبلغتها رسالة شديدة اللهجة بكل رقة وصوتي واطييييي
"شوفي ياحبيبتي مش انا اللي حد يعرف ياخد حب عمري قولي لها نونا ها تفوت اللي قبل كده بمزاجها بس ورحمة جوز عمة اللي جاب ابويا لو تيجي جنبه ها أعرف .. وساعتها انا لي عودة مروعة لا تُنسى في كليات الجمهورية كلها"
الولية: " انا مالي بالمواضيع دي من فضلك انا مليش دعوه بخصوصيات الناس وبعدين دي ست مخترمة مخترمة يا خبيبتي"
انا متأكده انها محترمة جدا بدليل راسمة على جواز .. وست بيت شاطرة كشري ومحشي .. وعارفة ان ذوقها حلو لأن جوزي تتمناه كل الستات وهي معذورة "أنا متجوزة قمر ياناس" لكن انا عارفه انك ها تنصحيها .. انا بيقولوا علي فافي بس لحد جبيصي ويسعدني ويشرفني اني اطلع مطاوي وسنج وسيوف .. عض قلبي ولا تعض جبيصي"
روحنا وانا موستريحة وباقي لي بهجت ابن اللزينة اللي انا متأكده انه فيه منه مشكلة على نفوخ جبيصي
انتي ظنانه يا نونا مش معنى ان ارواحكم لا تلتقي انه شر .. كده تروحي في داهية مع ربنا .. ده غير انه صاحب جبيصي والرجالة مش اندال ممكن يبيعوا المدام بس صاحبهم نو .. صاحبه ده البروموشن اللي بتاخديه عليه ساعة الجواز
هو انا ها أحط بيتي في نظرية النسبية والاحتمالات يا ستوتة .. انا شاكة انه خطر ده غير خناقة مروعة من جبيصي في البيت على طريقة ردي على بهجت في الجامعة واني محتاجة تربية واني لازم احترم بروح امه بهجت شوية اكراما لخاطر جوزي
وعملتي ايه يا ماري منيب؟
انا معملتش ياختي ربك كان عاوز البيت ده ميتخربش فسهلها لي .. انتي فاكرة ابن ادم بإيده حاجة احنا بنسلمها لربنا ثم بناخد بالأسباب وربك لو عاوز بيت يعمر شياطين الأنس والجن ولا يأثروا
كلامك مش مطمني يا ريا !!!!


بهجت جه بيتنا في مرة وبرحب بيه لأني مهذبة ومتعودتش أعادي حد دخل بيتي .. اتبجح في الكلام ويكاد يكون غلط في أدام جبيصي .. خلصت .. فينش .. فينيتو .. جاء لقضاه
لو بهجت اتكلم على تليفون بيتنا ها أقفله في وشه ولو جه لحد الباب ها أشتمه واقفل الباب في وشه
ليه هو انا مش راجل في وجهة نظر سموك .. مليش حكم انا في بيتي .. طب اعمليها كده مرة واحده انا مش ها أهدد
ورديتي بإيه؟
انا مرديتش انا انفجرت وكنت خلاص سايست كتير قوي يعني ضغط الرسالة وضغط ام محشي وضغط بهجت ضغط اما يشيلهم كلهم .. وبعد خناقتين وقمصتين وزعيقتين عملت اللي انا عاوزاه .. صاحبه يقابله بره يكلمه موبيل لكن لا عاش ولا كان اللي يهنني .. ليه بابي خلفني علشان اتهان؟
نو ابسلوطلي .. طيب وكلمتي جبيصي ولا لسه في حكاية دكتورة محشي وكشري
أماااااااااااااال مش جاية سعيدة ومبتهجة
امبارح من رضى ربنا علي كان هادي جبوصتي الحلوة لي .. وبمنطق وعقل ودين اتكلمنا واتصالحنا وانا اصلا مش زعلانة انا جزئيا مشتركة في الموضوع
جدعة انك ماكابرتيش .. انتي تشيلي كتير في اللي حصل وخاصة ان جوزك مش بصباص وعينه فارغه
أي نعم ها أترقى تاني إن شاء الله وها اسيب الدنيا ورايا تاني وشغلي بحبه ومش ها أهمله .. بس جوزي أهم وأكبر وأحلى نجاح ربنا يخليك يا جبيصي ياعمري
طيب واتأكدتي من نمرة الموبيل
اوف كورس لما واجهته الأول لسه ها ينكر .. نفسه صعبت عليه انه يكذب وكرامته لم تسمح ليه انه يكون ضعيف قال: انا حسيت انك بتغيري من مجرد زميلة .. فحطيت نمرتها بأسم عباس ودي غلطة مني الحقيقة .. انا احط نمرتها بأسمها زي أي زميلة وانتي تتفلقي
لبست وش العبيط تاني قال يعني صدقته وانا السبب .. أوك الأيام بيننا ياحبي
بس كنت فرحانة اني مظلمتش حد وان كل توقعات نسبية اينشتاين طلعت حقيقية واكتر حاجة بسطاني ستر ربنا معايا ياأوختي
وعملتي ايه امبارح بقى ياعفريته؟
عملت محشي والنهارده كشري هههههههههههههههههههههههههههههههههههههههه
هههههههههههههههههههههههههههههههههههههههههههههههههه

منقووووول