صلاح جاهين {{{{ عجبى }}}}

$صلاح جاهين {{{{ عجبى }}}} 2r464mzlj36_GreatEvening1$

الرباعيات

خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت ولا الحياه ؟
عجبي !!!

ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !!!

ياما صادفت صحاب ومصاحبتهمش
وكاسات خمور وشراب ومشربتهمش
أندم علي الفرص اللي انا سبتهم
ولا علي الفرص اللي مسبتهمش
عجبي !!

والكون ده كيف موجود من غير حدود
وفيه عقارب ليه وتعابين ودود
عالم مجرب فات وقال سلامات
ده ياما فيه سؤالات من غير ردود
عجبي !!!

أنا شاب لكن عمري ألف عام
وحيد لكن بين ضلوعي زحام
خايف ولكن خوفي مني أنا
أخرس ولكن قلبي مليان كلام
عجبي !!!!

يا باب يا مقفول ... إمتي الدخول
صبرت ياما واللي يصبر ينول
دقيت سنين ... والرد يرجع لي : مين ؟
لو كنت عارف مين أنا كنت أقول
عجبي !!!

أحب أعيش ولو في الغابات
أصحي كما ولدتني أمي وابات
طائر .. حوان.. حشره .. بشر ..بس أعيش
محلا الحياه .. حتي في هيئة نبات
عجبي !!

سهير ليالي وياما لفيت وطفت
وفى ليله راجع في الضلام قمت شفت
الخوف ... كأنه كلب سد الطريق
وكنت عاوز أقتله .. بس خفت
عجبي !!

كان فيه زمان سحليه طول فرسخين
كهفين عيونها وخشمها بربخين
ماتت لكين الرعب لم عمره مات
مع إنه فات بدل التاريخ تاريخين
عجبي !!

عجبتني كلمه من كلام الورق
النور شرق من بين حروفها وبرق
حبيت أشيلها فى قلبي .. قالت حرام
ده أنا كل قلب دخلت فيه اتحرق
عجبي !!!

رقبة قزازه وقلبي فيها انحشر
شربت كاس واتنين وخامس عشر
صاحبت ناس م.الخمره ترجع وحوش
وصاحبت ناس م.الخمره ترجع بشر
عجبي !!!!

ليه يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
عجبي !!!

ورا كل شباك ألف عين مفتوحين
وانا وانتي ماشيين يا غرامي الحزين
لو التصقنا نموت بضربة حجر
و لو افترقنا نموت متحسرين
عجبي !!!

نوح راح لحاله والطوفان استمر
مركبنا تايهه لسه مش لاقيه بر
آه م.الطوفان وآهين يا بر الأمان
إزاي تبان والدنيا غرقانه شر
عجبي !!

علي رجلي دم .. نظرتله ما احتملت
علي إيدي دم .. سألت ليه ؟ لما وصلت
علي كتفي دم .. وحتي علي رأسي دم
أنا كلي دم .. قتلت ؟ ..... ولا اتقتلت
عجبي !!

انا كل يوم أسمع ........ فلان عذبوه
أسرح في بغداد والجزاير واتوه
ما أعجبش م.اللي يطيق بجسمه العذاب
واعجب من اللي يطيق يعذب أخوه
عجبي !!!

ينبوع وفي الحواديت أنا سمعت عنه
إنه عجيب .. وفى وسط لهاليب لكنه
شقيت كما الفرسان طريقي .. لقيت
حتي الخنازير والكلاب شربوا منه
عجبي !!!!

يا قرص شمس مالهش قبة سما
يا ورد من غير أرض شب ونما
يا أي معني جميل سمعنا عليه
الخلق ليه عايشين حياه مؤلمه
عجبي !!!

شاف الطبيب جرحي وصف له الأمل
وعطاني منه مقام يا دوب ما اندمل
مجروح جديد يا طبيب وجرحي لهيب
ودواك فرغ مني .... وإيه العمل
عجبي !!!

أعرف عيون هي الجمال والحسن
و اعرف عيون تاخد القلوب بالحضن
وعيون مخيفه وقاسيه وعيون كتير
وبحس فيهم كلهم بالحزن
عجبي !!

إيش تطلبي يا نفس فوق كل ده
حظك بيضحك وانتي متنكده
ردت قالت لي النفس : قول للبشر
ميبصوليش بعيون حزينه كده
عجبي !!

إقلع غماك يا تور وارفض تلف
إكسر تروس الساقيه واشتم وتف
قال : بس خطوه كمان .. وخطوه كمان
يا اوصل نهاية السكه يا البير تجف
عجبي !!!

يا حزين يا قمقم تحت بحر الضياع
حزين أنا زيك وإيه مستطاع
الحزن مبقالهوش جلال يا جدع
الحزن زي البرد ... زي الصداع
عجبي !!!!

في يوم صحيت شاعر براحه وصفا
الهم زال والحزن راح واختفي
خدني العجب وسألت روحي سؤال
أنا مت ؟ و لا وصلت للفلسفه
عجبي !!!

الفيلسوف قاعد يفكر سيبوه
لا تعملوه سلطان ولا تصلبوه
متعرفوش إن الفلاسفه يا هوه
اللي يقولوه بيرجعوا يكدبوه
عجبي !!!

علي بعد مليون ميل من أرضنا
من الفراغ الكوني بصيت أنا
لا شفت فرق بين جبال وبحور
ولا شفت فرق ما بين عذاب أو هنا
عجبي !!

إنسان أيا إنسان ما أجهلك
ما أتفهك في الكون وما أضألك
شمس وقمر وسدوم وملايين نجوم
وفاكرها يا موهوم مخلوقه لك
عجبي !!

نظرت فوق للنجوم وانا ساير
رجليا عترت في الحفر والحجاير
بقيت أقول وانا ع.التراب: يا سلام
مش بس عبره أخذت لكن عباير
عجبي !!!

- يا نجم .. نورك ليه كده بيرتجف ؟
هو انت قنديل زيت ؟ أو تختلف
- أنا نجم عالي .. بس عالي قوي
وكل ما انظر تحت اخاف انحدف
عجبي !!!!

السم لو كان في الدوا منين يضر ؟
والموت لو عدونا .. منين يسر؟
حط القلم في الحبر واكتب كمان
.. والعبد للشهوات .. منين هو حر؟
عجبي !!!

وقفت بين شطين علي قنطــــــــــــــــــره
الكدب فين والصدق فيـــــــــــن يا تري
محتار ح.اموت .. الحوت خرج لي وقالي
هو الكلام يتقــــــــــــاس بالمســـــــــــطره
عجبي !!!

سرداب في مستشفي الولاده طويل
صرخات عذاب ورا كل باب وعويل
.. وفي الطــــــريق متزوقين البنات
متزوقـــــــــــــين للحب والمواويل
عجبي !!

الدنيا أوده كـــــــــــبيره للانتظار
فيها ابن أدم زيه زي الحـــــــمار
الهم واحد .. و الملل مشــــــترك
ومفيش حمار بيحاول الانتـــــحار
عجبي !!

أيوب رماه البين بكل العـــــــــلل
سبع سنين مرضان وعنده شلل
الصــــبر طيب .. صبر أيوب شفاه
بس الأكـــــــــاده مات بفعل الملل
عجبي !!!

نسمة ربيع لكن بتكوي الوشـــــــوش
طيور جميله بس من غير عشـــوش
قلوب بتخفق إنما وحـــــــــــــــــدها
هي الحياه كده .. كلها في الفاشوش
عجبي !!!!

يا طير يا عالي في الســــــما طظ فيك
متفتكرشي ربنا مصطــــــــــــــــفيك
برضـــــــــــك بتاكل دود وللطين تعًًًًودً
تمـــــــــص فيه يا حلو .. ويمص فيك
عجبي !!!

كروان جريح مضروب شعاع م.القمر
سقط من السموات فؤاده انكســـــــــر
جريت عليه قطه علشان تبلعـــــــــــه
أتاريه خيال شعراء وملهـــــوش أثر
عجبي !!!

ياللي نصحت الناس بشــــــــــــــرب النبيت
مع بنت حلوه .. وعود , وضحك , وحديت
مش كنت تنصحهم منين يكســــــــــــــــبوا
تمن ده كله ؟ ... ولا يمكن نســـــــــــيت
عجبي !!

ما حد في الدنيا واخد جزاتــــــــــــــــــه
ولا حــــــــــــــــد بيفكر في غير لذاذاته
متعرفيش يا حبيبتي .. أنا وانتي مين ؟
إنتي عروس النيل ... وأنا النيل بذاته
عجبي !!

رقاصه خرسا ورقصه من غير نغــم
دنيا . . يا مين يصالحها قبل النـــــدم
ساعتين تهز بوجههـــــــــــــــا يعنـي
يترجرجوا نهديها يعني نعـــــــــــــــم
عجبي !!!

إخطفني ياللي تحبني ع.الحصان
الدنيا قالت يوم في ماضي الزمان
إخطفني ياللي تحبني ع.الـــــفرس
الدنيا قالت .. قام خطفها الشيطان
عجبي !!!!

من بين شقوق الشيش وشقشقت لك
مع شهقة العصافير وزقزقـــــــت لك
نهار جديد انا . . قوم نشوف نعــمليه
انا قلت يا ح.تقتلني .. يا ح.اقــــــــتلك
عجبي !!!

جالك أوان ووقفت موقف وجـــود
يا تجود بده يا قلبي يا بده تجــــود
ما حد يقدر يبقي علي كل شـــــــئ
مع إن – عجبي – كل شئ موجود
عجبي !!!

جالك اوان وعرفت مشي الجنايــــــــز
كيف شفتها يا عبد رب اللذايــــــــــــذ
قال : شفت شيل بالحيل فقير أو اميـــر
كما شالوا في الخمامير فواضي القزايز
عجبي !!

أنا كنت شئ واصبحت شئ ثم شــئ
شوف ربنا .. قادرعلي كل شـــــــئ
هز الشجر شواشيه ووشوشني قال :
لابد ما يموت شئ عشان يحيا شئ
عجبي!!

يا مشرط الجراح أمانه علـــــــــــيك
و انت فى حشايا تبص من حواليــك
فيه نقطه سوده في قلبي بدأت تبان
شيلها كمان .. والفضل يرجع إليك
عجبي !!!

كيف شفت قلبي والنبي يا طبيــــــــــــب
همد ومات ولا سامع له دبيـــــــــــــب
قاللي لقيته مختنق بالدمـــــــــــــــــــــوع
و ملوش دوا غير لمسه من إيد حبيب
عجبي !!!!

تسلم يا غصن الخوخ يا عود الحطـــــــــب
بييجي الربيع .. تطلـــــــــــع زهورك عجب
وانا ليه بيمضـــــــــــي ربيع وييجي ربيع
ولسه برضك قلــــــــــــــــــبي حتة خشب
عجبي !!!

قلبي عليل يا ناس وفي الكاس دواه
مديت له إيدي شربت م.اللي جــــواه
جنبي الشمال خف .. اليمين اتــــوجع
و إيه يداوي الكبد م.اللي كـــــــــــواه
عجبي!!

.. دي مزكرات وكتبتها من ســـــــــنين
في نوته زرقا لون بحور الحنيــــــــــــن
عترت فيها .. رميتها في المهمـــــــلات
وقلت صحيح أما صحيح كلام مخبولين
عجبي !!

دخل الشتا وقفل البيبان ع.البـــيوت
وجعل شعاع الشمس خيط عنكبوت
وحاجات كتير بتموت في ليل الشــتا
لكن حاجات أكتر بترفض تمــــــوت
عجبي !!

- الدنيا من غير الربيع مــــــــيته
ورقة شجر ضعفـــــــانه ومـــفـــــتــته
- لا يا جدع غلطان تأمل وشوف
زهر الشتا طالع فــــــــي عز الشـــــتا
عجبي !!!

ياللي انت بيتك قش مفروش بريش
تقوي عليه الريح .. يصبح مفيش
عجبي عليك حواليك مخالب كـــــبار
وملكش غير منقار وقادر تعيش
عجبي !!!!

سمعت نقطة ميه جوه المحيـــــــط
بتقول لنقطه متنزليش في الغويط
أخاف عليكي م.الغرق .. قلـــــت أنا
ده اللي يخاف م.الوعد يبقي عبيط
عجبي !!!

بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
عجبي !!!

فارس وحيد جوه الدروع الحديد
رفرف عليه عصفور وقال له نشيد
منين .. منين .. ولفين لفين يا جدع
قال من بعيد ولسه رايح بعيد
عجبي !!

كان فيه قمر كأنه فرخ الحمام
علي صغره دق شعاع شق الغمام
أنا كنت حاضر قلت له ينصرك
إشحال لما حتبقي بدر التمام
عجبي !!

النهد زي الفهد نط اندلع
قلبي انهبش بين الضلوع وانخلع
ياللي نهيت البنت عن فعلها
قول للطبيعه كمان تبطل دلع
عجبي !!!

صوتك يا بنت الإيه كأنه بدن
يرقص يزيح الهم يمحي الشجن
يا حلاوتي وبدنك كأنه كلام
كلام فلاسفه سكروا نسيوا الزمن
عجبي !!!!

كرباج سعاده وقلبي منه اجلد
رمح كأنه حصان ولف البلد
ورجع لي نصل الليل وسألني .. ليه
خجلان تقول انك سعيد يا ولد
عجبي !!!

مزيكه هاديه الكون فيها انغـــــمر
وصيف وليل وعقد فل وسمر
يا هلتري الناس كلهم مبسوطين
ويا هلتري شايفين جمال القمر ؟
عجبي!!

إنشد يا قلبي غنوتك للجمــــــــــــــــــال
وارقص في صدري من اليمين للشمال
مهوش بعيد تفضل لبكره سعيــــــــــد
ده كل يوم فيه الف الف احتمـــــــــــــال
عجبي !!

آه لو انا ومحبوب جزنا الفضـــــا
في سفينه وحدينا .. واشيا رضـــا
ساعة صفا تعجبنا نرجع لهــــــــــا
والهم قبل ما ييجي .. يبقي مضـى
عجبي !!

أنا إله الوجد رب الهيــــــــــــــــام
أضرب بسهم الوهم وهم الغـــــرام
وهم الغرام من كتر ما هو لذيـــــذ
رشقت انا فى صدري جميع السهام
عجبي !!!

حدوته عن جعران وعن خنفســــــــــه
اتقابلوا حوا بعض ساعة مســـــــــــــــا
و لا قال لهم حد اختشوا عيب حـــــرام
و لا حد قال دي علاقه متدنســــــــــــــه
عجبي !!!!

ياللي عرفت الحب يوم وانطــــــــــــوي
حسك تقال مشتاق لنبع الهـــــــــــــــوي
حسك تقول مشتاق لنبع الغــــــــــــــــرام
ده الحب .. مين داق منه قطره ... ارتوي
عجبي !!

زحام وأبواق سيارات مزعجـــــه
للي يطول له رصيف .. يبقي نجـــا
لو كنت جنبي يا حبيبي أنــــــــــــا
مش كنت أشوف إن الحياه مبهجه
عجبي!!

إيديا في جيوبي وقلبي طــــــــرب
سارح في غربه بس مش مغترب
وحدي لكين ونسان وماشي كده
وبابتعد ما اعرف .. أو باقـــــترب
عجبي !!

يا ميت ندامه ع.القلوب الخـــــــــــلا
لا محبه فيها ولا كراهـــــــــــه ولا
حتي يا قلبي الحزن معادش فيـــــك
معلهش .. لك يوم برضه راح تتملا
عجبي !!

مرحب ربيع مرحب ربيع مرحبــــــــــه
يا طفل يا للي فى دمي ناغا وحبــــــــا
علشان عيونك يا صغنن هويــــــــــــت
حتي ديدان الأرض والأغربــــــــــــــه
عجبي !!!

فتحت شباكي لشمس الصبـــــــــــــــــاح
مدخلش منه غيــــــــــر عويل الريـــاح
وفتحت قلبي عشان ابوح بالألـــــــــــــم
مخرجش منه غير محبه وسمــــــــاح
عجبي !!!!

غمست سنك في السواد يا قلـــــــــــــــم
عشان ما تكتب شعر يقطر ألــــــــــــــــم
مالك جرالك إيه يا مجنون ... وليــــــــه
رسمت ورده وبيت وقلب وعلـــــــــــم
عجبي

انا الذي عمري اشتياق في اشتيـــاق
و قطر داخل في محطة الـــــــــفراق
قصدت نبع السم وشربت ســـــــــم
من كتر شوقي وعشمي في التريـــاق
عجبي !!!

انا الذي عشت الزمن مضيعـــــــــه
بروح حزينه معفنه مضعضعــــــه
زرعت شجره سنط لجل انجــــــرح
لقتها شعر البنت ومفرعــــــــــــه
عجبي !!

لو فيه سلام في الأرض وطمان وامن
لو كان مفيش ولا فقر ولا خوف جبن
لو يملك الانسان مصير كل شـــــــــــئ
انا كنت اجيب للدنيا ميت ألف ابــــــــــن
عجبي !!

العشب طاطا للنسايم ونـــــــــــــــــــــخ
أخضر طري ملهش في الحســـــــن أخ
عصفور عبيط انا .. غاوي بهجه وغنا
ح.انزل هنا.. وانشا لله يهبرني فــــــــخ
عجبي !!!

أوصيك يابني بالقمر والزهـــــــــــــور
أوصيك بليل القاهره المسحـــــــــــــور
وإن جيت في بالك .. إشتري عقد فل
لأي سمرا.. وقبري إوعك تـــــــــزور
عجبي !!!!

غمض عينيك وارقص بخفه ودلع
الدنيا هي الشابه وانت الــــــــجدع
تشوف رشاقة خطوتك تعبــــــــدك
لكن انت لو بصيت لرجليك .... تـقع
عجبي !!!

حاسب من الاحزان وحاســـــــب لها
حاسب علي رقابيك من حبلـــــــــــها
راح تنتهي ولابد راح تنتهــــــــــي
مش انتهت أحزان من قبلهــــــــــا ؟
عجبي !!!

يأسك وصبرك بين إيديك وانت حر
تيأس ما تيأس الحياه راح تــــــــمر
أنا دقت مندا ومندا عجبي لقيــــــت
الصبر مر وبرضك اليـأس مـــــــر
عجبي !!

ولدي نصحتك لما صوتي اتنبــــــــــــح
متخفش من جني ولا من شبـــــــــح
وان هب فيك عفريت قتيل إسألـــــــــه
مدافعش ليه عن نفسه يوم ما اندبح
عجبي !!

ولدي إليك بدل البالون ميت بالــــــون
انفخ وطرقع فيه علي كل لـــــــــــون
عساك تشوف بعينك مصيرالرجــــــال
المنفوخين في الستره والبنطلـــــون
عجبي !!!

خوض معركتها زي جدك ما خــــاض
صالب وقالب شفتك بامتـــــــــــعاض
هي كده ... ما تنولش منها الأمـــــــل
غير بعض صد ورد ووجاع مخاض
عجبي !!!!

كام اشتغلت يا نيل في نحت الصخور
مليون بئونه والف مليون هاــــتور
يا نيل أنا ابن حلال ومن خلفتــــــك
وليه صعيبه علي بس الأمــــــــور
عجبي !!!

منين أجيبها كلمه متألمـــــــــــــــــه
لعيبه فايره حايره ومصممــــــــــه
منين اجيبها كلمه تكون بنـــت ارض
تشفي اللي مشافهوش كلام السمـا
عجبي !!!

أنا قلت كلمه وكان لها معنييـــــــــن
كما بطن واحده وتوأمين زي وشين
لو دنيا شر .. التوأم الخير يمـــــــوت
لو دنيا خير .. الشرح يعيش مــنين
عجبي !!

أنا اللي بالأمر المحال اغتــــــــــــوي
شفت القمر نطيت لفوق في الهـــــوا
طلته ما طلتوش إيه انا يهمنـــــــــي
و ليه .. ما دام بالنشوه قلبي ارتوي
عجبي !!

بره القزاز كان غيم وأمطار وبــــــــرق
ميهمنيش – أنا قلت – ولا عندي فرق
غيرت رأيي بعد ساعة زمـــــــــــــــــان
وكنت في الشارع .. وفي الجزمه خرق
عجبي !!!

عيني رأت مولود علي كتف أمـــــــــــه
يصرخ تهنن فيه يصرخ تضــــــــــــمه
يصرخ تقول يابني ما تنطق كـــــــلام
ده اللي ميتكلمش يكتر همـــــــــــــه
عجبي !!!!

يا عندليب متخافش من غنوتك
قول شكوتك واحكي علي بلوتك
الغنوه مش ح.تموتك إنمــــــــــا
كتم الغنا هو اللي ح.يموتــــــــك
عجبي !!!

ياللي بتبحث عن إله تعــــــــــــبده
بحث الغريق عن أي شئ ينجـــده
الله جميل و عليم و رحمن رحــيم
أجمل صفاته .. وانت راح توجده
عجبي !!!

حقرا وفوق كوكب حقير محتقـــــــر
في الكون تكون دنياكو إيه يا بــــــقر
رملايه من صحرا ؟ لكين إيش تقول
والكون بحاله جوه عقل البشــــــر
عجبي !!

لا تجبر الانسان ولا تخـــــــــيره
يكفيه ما فيه من عقل بيحيــــــره
اللي النهارده بيطلبه ويشتهــــيه
هو اللي بكره ح.يشتهي يغيـــــره
عجبي !!

ياللي في حماه الشمس تلقي المــــلاذ
و ألف بكره و بكره .. في ضلوعه لاذ
مين أنت ؟ مارد ؟ رب ؟ قال لأ ده بس
انا اللي باروي القمح واسقي الفــولاذ
عجبي !!!

غسل المسيح قدمك يا حافي القـدم
طوبي لمن كانوا عشانك خــــــــدم
صنعت لك نعليك أنا يا أخــــــــــــي
مستني إيه .. ما تقوم تدوس العدم
عجبي !!!!

البط شال عدي الجبال والبحــــــور
ياما نفسي اهج .. احج ويا الطــيور
أوصيك يا ربي لما اموت .. والنبي
ما تودنيش الجنه .. للجنه ســـــــور
عجبي !!!

طال انتظاري للربيع يرجــــــــــــــع
والجو يدفا والزهور تطلــــــــــــع
عاد الربيع عرمرم شبـــــــــــــــاب
إيه اللي خلاني ابتديت افــــــــزع ؟
عجبي !!!

ولو اتضنيت وفنيت وعمري انفرط
مش عاوز الجأ للحلول الوســـــــــط
وكمان شطط وجنون مانيش عــاوز
يا مين يقول لي الصح فين والغلــــط
عجبي !!

عاد الربيع كأنه طعم الحــــــــــــــــــب
والحب نار جوه العروق بتصـــــــــب
اتمتع ازاي بيه وانا متقطـــــــــــــــع
من كتر خوفي لا في الخطيئه يطب ؟
عجبي !!

ازاي شبابنا يقوم وياخـــــــــد دوره
من غير صراخ يئذيه ويجرح زوره
يا هلتري أحسن له يقعد ساكـــــــــت
أو ينترك ولو خرج عن طــــــوره ؟
عجبي !!!

عيني رأت عصفور ووياه ابـــــــــنه
بيحدفه في الريح وياخده فى حضنه
نوبتين وتالت نوبه – عجبي عليهم –
كانوا سوا بيرفرفرا ويغنـــــــــوا
عجبي !!!!

احسن ما فيها العشق والمعشقــــــه
و شويتين الضحك والتريقـــــــــــــه
شفت الحيه . لفيت . لقيت الألــــــــذ
تغييرها . وده يعني التعب والشقا
عجبي !!!

عجبي علي العجب العجيب العجاب
لما الحقيقه تطل بعد احتجاب
وتروح وتحلا وفجأه تصبح مفيش
كمثل طراطيش بحر ياما خد وجاب
عجبي !!!

في الهو ماشي يا بهلوان إش إِش
يا فراشه منقوشه علي كل وش
شقلبت عقلي وعقلي شقلبني
وكنت باحسبني بقيت مندهش
عجبي !!

وقفت ساعة الصبح باغسل سناني
قالت لي شايف قوتي ولمعاني ؟
إيش تطلب اليوم مني ضحكة أسد ؟
والا ابتسامة اعلانات أمريكاني ؟
عجبي !!

الحلو يم اليم صابــــــــــح رايح
سارح في حضن الميه سابح سايح
الحلو داب في البحر , قلــــت أدوقه
وجدت لسه البحر برضك ماــــــلح
عجبي !!!

يا كل كلمه للعجب في قامــــــــــــوس
انسكلوبيديا لسان العرب أو لا لاروس
تعالوا نجدة . ده لسه في عصـــــرنا
الشمس والبحر العريض بالفـــلوس
عجبي !!!!

الموج تلول تهبط وتطلع تلــــــــــــول
يا بحر خدني الشط صاحبك ملـــــــول
ولا بلاش الشط ح.اعمل به أيـــــــه
ده ريحته طحلب مهري وام الخلــول
عجبي !!!

مركب ورق من نفخه تتطـــــــــوح
ركبتها والكل بيــــــــــــــــلوح
سوحت فيها اتنين وخمسين سنــــه
للآن ..... ولا بتغرق ولا تـــــروح
عجبي!!

عالجسر فت الصبح تحت الضباب
بين اللي لسه بينغرس واللي طاب
ما اهتز قلبي لنبت طالع جديـــــــد
قد اللي ماشي .. وتحت باطه كتاب
عجبي !!

يا خالق الكون بالحساب والجبر
وخالقني ماشي بالاختيار والجبر
كل اللي حيلتي زمزمية أمـــــــل
وازاي تكفيني لباب القــــــــــــبر؟
عجبي !!

قاعده قناني الخمر ساكته وساهيه
مع ابن آدم في الشبه متناهيـــــــــــه
مفيش كده روقان في لحظه تشوفهم
وبعدها بلحظه يودوا في داهيــــــه
عجبي !!!

حتة محاره وجدتها في يوم لقيـه
قالت لي شوف كيف الطبيعه شقيه
نظرت للكهف اللي فيها ولقيــــت
إن الطبيعه كمان لا أخلاقيــــــــــه
عجبي !!!!

بلياتشو قال إيه بس فايدة فنونــــي ؟
وتلات وقق مساحيق بيلونونـــــــي
والطبل والمزامير وكتر الجعـــــــير
إذا كان جنون زبوني زاد عن جنوني
عجبي !!!

نقطة مراره كمان علي مشروبـــــــــــي
دوبها يا ساقي حسب مطلوبـــــــــــــــي
طبع الحياه .. مش برضه فيها وفيها ؟
ليالي وردي ونهارات خروبــــــــــــي ؟
عجبي!!

وسط الحطام اتفرجوا يا أنـــــــــام
تمثال ملك . ومبوله م.الرخــــــام
لتنين نحتهم نفس أسطي الحجــــر
وكانوا ذات يوم كتلتين لسه خــام
عجبي !

عيد والعيال اتنططوا ع.القبـــــــور
لعبوا استغمايه .. ولعبوا بابــــــور
وباللونات ونايلونات شفتشـــــــي
والحزن ح.يروح فين جنب السرور
عجبي !!

الضحك قال يا سم ع.التكشيـــــــر
امشير وطوبه وانا ربيعي بشيـر
مطرح م.بظهر بانتصر ع.العدم
انشالله أكون رسمايه بالطباشيــر
عجبي !!!!

أهوي الهوي وهمس الهوي في العيون
وبسمة المغرم ودمعة الحنـــــــــــــــون
وزلزلات الحب نهد الصبـــــــــــــــــــــا
أكون انا المحبوب أو لا أكــــــــــــــــون
عجبي !!!

يا ملونين البيض في شم النسيـــــم
لون الحنين والشوق وخمر النديم
متعرفوش سايق عليكوا النبــــــي
تلونوا الأيام بلون النعيــــــــــــــم ؟
عجبي!!

الدنيا صندوق دنيا .. دور بعــــد دور
الدكه هي .. وهي كل الديكـــــــــور
يمشي اللي شاف ويسيب لغيره مكان
كان عربجي أو كان امبراطــــــــور
عجبي !

قطي العزيز راقد علي الكنبــــــات
في نوم لذيذ .. وبيلحس الشنبات
وانا كل عين فنجان مدلدق قلــق
صدق اللي قال إن الحياه منابات
عجبي !!

قالوا السياسه مهلكه بشكل عـــــــــــام
و بحورها يابني خشنه مش ريش نعام
غوص فيها تلقي الغرقانين كلهــــــــــم
شايلين غنايم .. والخفيف اللي عـــــام
عجبي !!!

سلام سلام سلام سلام ... سلام
كلام كلام كلام كلام ... كلام
هز الورق يا صاحبي كدهــــوه
يطلع كلام سلام .. وسلام كلام
عجبي !!!!

فوق تحت . ورا قدام . يمين شمـــال
في الجو . تحت الميه . أو في الرمال
طلب الكمال يحرم علي الممـــــــــكن
والممكنات دول محرومين م.الكمال
عجبي !!!

صلاح جاهين {{{{ عجبى }}}} DXd64170

الله بجد بجد كلام روعة يا قمر
تسلمي عليه كتير

تسلمى لمرورك يا قلبى

يارب يكون عجبك

نورتينى

حلو اوى الكلام ده

الكلام دا حلو اوووووووووووووووى تسلمى يا قمر علية

» رباعيات صلاح جاهين كامله...........بجد رووووووعه
» قدم قلب امه مهرا لزوجته .......عجبى !